lunes, 17 de febrero de 2020

Froita na escola


Durante as últimas semanas gozamos no colexio do programa Froita na Escola que ofrece a Xunta de Galicia a través do FOGGA aos centros educativos que o soliciten. 

Esta actividade enmárcase dentro do proxecto de “Ponte Sampaio escola saudable” que pretende desenvolver no alumnado hábitos saudables de consumo, coidado da natureza, etc.
Durante 10 días o alumnado puido degustar, de xeito gratuíto para o centro e as familias, distintas froitas de temporada como plátanos, mandarina, arándanos, mazá, kiwi ou pera.
O alumnado recibiu a froita durante o momento do recreo da man do seu profesorado ou dos voluntarios da biblioteca.
A actividade tivo moi boa acollida tanto por parte do alumnado como das familias e repetírase a finais do mes de maio durante un novo período de 10 días lectivos. 
Ademais, a experiencia resultou tan satisfactoria que o centro continuará con esta actividade de repartir froita na escola ao alumnado durante todos os mércores de aquí a fin de curso.







sábado, 15 de febrero de 2020

lunes, 20 de enero de 2020

Terapia canina

O mércores 15 de xaneiro o alumnado de 3º, 4º, 5º e 6º participou no centro nun OBRADOIRO EDUCACIÓN EN VALORES sobre a Terapia con animais.
O taller iniciouse cunha charla grupal, onde se explican as normas de comportamento, se presenta aos cans da terapia e as súas características, e explican brevemente o labor que realizan. Traballaron no chan ao redor do can, buscando contacto e cercanía para ter unha charla distendida na que se traballa a SOLIDARIDADE, TRABALLO EN EQUIPO, RESPECTO e que todos somos SERES ÚNICOS. Tanto a entrada como a despedida fíxose en silencio, empregando a linguaxe de signos.

Todo o alumnado do centro que participou na actividade quedou moi satisfeito e aprenderon moito sobre os animais, os seus coidados, as súas virtudes, as axudas que nos prestan...









martes, 17 de diciembre de 2019

Luis Zahera. O actor de cine...

O 13 de decembro visitou o CEIP de Ponte Sampaio o actor Luis Zahera, como broche final ao primeiro trimestre no que o colexio está traballando o proxecto do cine. 
O alumnado e profesorado leva xa unhas semanas preparando esta visita e investigando sobre a súa vida, as súas películas... e preparando o centro educativo para a súa visita: fixemos un mural, elaboramos unha presentación multimedia sobre a súa vida, preparamos un cadro para grabar as súas pegadas, debuxamos caricaturas súas, etc. 
Á súa chegada ao cole fixemos unha pequena exposición e resumo da súa vida e logo Luis Zahera falou co alumnado e profesorado e explicoulles como era a vida dos actores, que cousas lle gustaban máis e menos da súa profesión, como se sentira ao recibir o Goya... 
Os nenos fixéronlle preguntas moi interesantes, por exemplo: 
Cal era a túa materia preferida no colexio? “Educación Física”. 
Gústanche as matemáticas? “ a min as matemáticas non me entran na cabeza”.
Cando decidiches ser actor? “o 12 de febreiro de 1982 fun coa miña irmá ao teatro e namoreime da profesión; vós, algún día, atoparedes algo que vos guste tanto que saberedes que ese é o voso camiño e deberedes seguilo”. 
Se puideses ser unha persoa diferente por un día, quen serías? “sería un neno/a coma vós, é máis eu sigo sendo un neno”.
 Fixeches algunha vez algunha película de vaqueiros? “non, e mira que me gustaban na súa época” Cal foi o personaxe que máis che gustou facer? “o que recordo con máis cariño é o do Petróleo, en Mareas Vivas”. 
Comentounos tamén que non lle gustaban nada as películas de medo nin os musicais e o alumnado deuse conta de que a pesar de que sempre facía de malo nas películas e series, na vida real non é así, senón todo o contrario... é moi amable e cariñoso cos nenos/as e moi empático e atento; ademais, tampouco di palabrotas... como en todas as súas películas. 
Logo da entrevista todo o alumnado fixo fotos de grupo con el, asinounos algún autógrafo e por último deixou as súa pegadas no noso mural e fixémoslle un pequeno agasallo con moito cariño.